މާލެ — ދިވެހި ފަންނުވެރިންނާއި ކުދި ވިޔަފާރިތަކުން ބޭރު ގައުމުތަކުން ފައިސާ ބަލައިގަތުމަށް ކުރަމުން އައި ދިގު އިންތިޒާރަށް ނިމުން ފަހިކޮށްދެމުން، ދުނިޔޭގެ އެންމެ ބޮޑު އޮންލައިން ޕޭމަންޓް ނެޓްވޯކް “ޕޭޕަލް” ގެ ހިދުމަތް ރަސްމީކޮށް ދިވެހިރާއްޖެއަށް ތައާރަފުކޮށްފިއެވެ.
މި ތާރީޚީ ހިދުމަތް އިފްތިތާހުކޮށްދެއްވީ ބާސެލޯ ނަސަންދުރާގައި ބޭއްވި ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. އުރީދޫ މޯލްޑިވްސްއިން ބޭއްވި މި އިވެންޓުގައި ރައީސް ވިދާޅުވީ، މިއީ އެމަނިކުފާނު ވެރިކަމާ ހަވާލުވެވަޑައިގަތުމުގެ ކުރިން ޒުވާނުންނަށް ވެވަޑައިގަތް އެންމެ މުހިންމު އެއް ވައުދު ފުއްދުން ކަމަށެވެ. އަދި މީގެ ކުރިން ރާއްޖޭގެ ޒުވާނުންނަށް ބޭރުން އެއްޗެހި ގަނެވުނު ނަމަވެސް، އަމިއްލަ ހުނަރާއި އުފެއްދުންތެރިކަން ދުނިޔެއަށް ވިއްކައިގެން ފައިސާ ހޯދުމަށް ކުރިމަތިވެފައި އޮތް “އަމިއްލައަށް އުފައްދާފައިވާ ހުރަސްތަކުގެ ޒަމާން” މިހާރު ނިމުމަކަށް އައިސްފައިވާ ކަމަށް ރައީސް ފާހަގަކުރެއްވިއެވެ.
މި ހިދުމަތް ދިވެހިރާއްޖޭގައި ހަގީގަތަކަށް ހެދުމަށްޓަކައި ސަރުކާރުން ވަނީ ޖޫން 2024 އިން ފެށިގެން، ޕޭޕަލްގެ ސީއީއޯ އެލެކްސް ކްރިސްއާ އެކު ރަސްމީ މަޝްވަރާތައް ފަށާފައެވެ. އަދި އެމެރިކާގެ އެހީތެރިކަމާ އެކު އިގްތިސާދީ ވަޒީރު މުހައްމަދު ސައީދު ކުރެއްވި މަސައްކަތްޕުޅުތަކާއި، ބައިނަލްއަގުވާމީ “އެންޓި-މަނީ ލޯންޑަރިން” ސަލާމަތީ މިންގަނޑުތަކަށް ފެއްތުމަށް އުރީދޫއިން ކުރި ބުރަ މަސައްކަތްތަކަށް ފަހު، މި ނިޒާމު މިހާރު ވަނީ އުރީދޫ ފިންޓެކް މެދުވެރިކޮށް އެމް-ފައިސާ އާ ގުޅާލެވިފައެވެ. މިއާ އެކު، ބޭރުން ލިބޭ ފައިސާ ސީދާ ދިވެހިރާއްޖޭގެ ބޭންކް އެކައުންޓްތަކަށް ވިތުޑްރޯ ކުރެވޭނެ ރަސްމީ މަގު ވަނީ ހުޅުވިފައެވެ.
މި އިސްނެގުމަކީ ސަރުކާރުގެ ‘ވިޝަން 2040’ ގެ ދަށުން ރާއްޖޭގެ ޑިޖިޓަލް އިގްތިސާދު ކުރިއަރުވައި، 2030 ގެ ކުރިން ގައުމީ އުފެއްދުންތެރިކަމުގެ 15 އިންސައްތަ ހިއްސާކުރާ ބަޔަކަށް ޑިޖިޓަލް ދާއިރާ ހެދުމަށް އެކުލަވާލާފައިވާ ‘މޯލްޑިވްސް 2.0’ އެޖެންޑާގެ މުހިންމު ބިންގަލެކެވެ. މީގެ ސަބަބުން ރަށު ފަތުރުވެރިކަން ހިންގާ ގެސްޓްހައުސްތަކާއި، ޑައިވް ސެންޓަރުތަކުގެ އިތުރުން، ރާއްޖޭގެ ކޮންމެ ރަށެއްގައި ތިބެގެން އޮންލައިންކޮށް މަސައްކަތްކުރާ ފްރީލާންސަރުންނާއި، ޑިވެލޮޕަރުން އަދި އާޓިސްޓުންނަށް ވެސް ދުނިޔޭގެ ކޮންމެ ހިސާބަކުން ސީދާ ޑިޕޮސިޓްތަކާއި ފައިސާ ބަލައިގަތުމުގެ ފުރިހަމަ މިނިވަންކަން ލިބޭނެއެވެ.
މީގެ އިތުރުން، ޒުވާން އުފެއްދުންތެރިންނަށް އެހީވުމަށްޓަކައި ހާއްސަ މައިކްރޯ-ފިނޭންސިން ފުރުސަތުތަކާއި “ކްރިއޭޓިވް އިކޮނޮމީ ކައުންސިލް” އެކުލަވާލާފައިވާއިރު، އަންނަ ނޮވެމްބަރު 11 ގައި މާލޭގައި ހުޅުވުމަށް ތައްޔާރުވަމުންދާ “ކްރިއޭޓަރ ހަބް” ގެ ހިދުމަތް ބ. ތުޅާދުއާއި ގދ. ގައްދޫ ފަދަ ސަރަހައްދީ މަރުކަޒުތަކަށް ފުޅާކުރެވޭނެ ކަމަށް ރައީސް އިއުލާނުކުރެއްވިއެވެ.
ރާއްޖެއަކީ އުފެއްދުންތެރި ގައުމަކަށް ހެދުމަށް 2026 ވަނަ އަހަރު “ގައުމީ އުފެއްދުންތެރިކަމުގެ އަހަރު” ގެ ގޮތުގައި ކަނޑައަޅާފައިވާއިރު، ޕޭޕަލްގެ މި ތައާރަފަކީ ބަހުގެ އިތުރުން އަމަލުން ދައްކުވައިދިން ‘މޯލްޑިވްސް 2.0’ ގެ ހަގީގީ ފެށުން ކަމަށް ސަރުކާރުން ބުނެއެވެ.
