ދައުލަތަށް ހިލޭ އެހީގެ ގޮތުގައި މިއަހަރުގެ މިހާތަނަށް 439 މިލިއަން ރުފިޔާ ލިބިފައިވާ ކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ. މިއަހަރުގެ ދައުލަތުގެ ބަޖެޓުގައި ހިލޭ އެހީގެ ގޮތުގައި ލިބޭނެ ކަމަށް އަންދާޒާކޮށްފައިވަނީ 374 މިލިއަން ރުފިޔާ ކަމަށްވާއިރު، މިހާތަނަށް ލިބުނު އަދަދަކީ ބަޖެޓުގައި ލަފާކުރި މިންވަރަށްވުރެ 17 އިންސައްތަ އިތުރު އަދަދެކެވެ. މާލީ މާހައުލަށް ބަލާއިރު މިއީ ވޭތުވެދިޔަ 2025 ވަނަ އަހަރު ހިލޭ އެހީގެ ގޮތުގައި މުޅި އަހަރު ދުވަހު ލިބުނު 400 މިލިއަން ރުފިޔާއަށްވުރެ ވެސް އިތުރު މިންވަރެކެވެ. މިއަހަރުގެ ބަޖެޓުގައި ސީދާ ފައިސާގެ ގޮތުގައި ލިބޭ ހިލޭ އެހީގެ ގޮތުގައި އެއްވެސް އަދަދެއް ހިމަނާފައިނުވި ނަމަވެސް، އެކި މަޝްރޫއުތަކަށް ހިލޭ އެހީގެ ގޮތުގައި 324 މިލިއަން ރުފިޔާ ލިބޭނެ ކަމަށް ބަޖެޓު ފޮތުގައި ވަނީ އަންދާޒާކޮށްފައެވެ.

މިއަހަރުގެ މިހާތަނަށް ދައުލަތަށް ލިބުނު ޖުމްލަ އާމްދަނީ އާއި ހިލޭ އެހީގެ މިންވަރު ވަނީ 18.9 ބިލިއަން ރުފިޔާއަށް އަރާފައެވެ. މާލީ ވުޒާރާގެ މެއި މަހުގެ ރިޕޯޓަށް ބަލާއިރު، ދައުލަތަށް ލިބުނު އާމްދަނީގެ އެންމެ ބޮޑު ބަޔެއް ހިއްސާކުރަނީ މުދަލާއި ހިދުމަތުން ނަގާ ޓެކްސްގެ އާމްދަނީއެވެ. އެގޮތުން ފަތުރުވެރިކަމުގެ ދާއިރާގެ މުދަލާއި ހިދުމަތުން ނަގާ ޓެކްސްގެ ގޮތުގައި 6 ބިލިއަން ރުފިޔާ ލިބިފައިވާއިރު، އާންމު މުދަލާއި ހިދުމަތުން ނަގާ ޓެކްސްގެ ގޮތުގައި 2.4 ބިލިއަން ރުފިޔާ އަދި އިމްޕޯޓް ޑިއުޓީގެ ގޮތުގައި 1.3 ބިލިއަން ރުފިޔާ ވަނީ ދައުލަތަށް ލިބިފައެވެ. މީގެ އިތުރުން ޓެކްސް ނޫން އާމްދަނީގެ ގޮތުގައި 3.8 ބިލިއަން ރުފިޔާ ލިބިފައިވާކަން ހިސާބުތަކުން ދައްކައެވެ.

އާމްދަނީގެ އިތުރުން ދައުލަތުގެ މާލީ ރެޒާވް ވަރުގަދަކުރުމަށްޓަކައި ސޮވެރިން ޑިވެލޮޕްމަންޓް ފަންޑަށް ފައިސާ ޖަމާކުރުމުގެ އަމާޒުވެސް ސަރުކާރުން އަންނީ ހާސިލުކުރަމުންނެވެ. އެގޮތުން މިއަހަރުގެ މިހާތަނަށް އެ ފަންޑަށް 1.2 ބިލިއަން ރުފިޔާ ވަނީ ޖަމާކޮށްފައެވެ. މިއީ މުޅި އަހަރު ދުވަހުގެ ތެރޭގައި އެ ފަންޑަށް ޖަމާކުރުމަށް ސަރުކާރުން ކަނޑައެޅި 2.4 ބިލިއަން ރުފިޔާގެ އަހަރީ އަމާޒުގެ 51 އިންސައްތައެވެ. ނަމަވެސް، މެދުރާސްތާގެ މާލީ އަންދާޒާތަކަށް ބަލާއިރު ކުރިއަށް އޮތް ދެ އަހަރު ރާއްޖެއަށް ހިލޭ އެހީގެ ގޮތުގައި އަހަރަކު ލިބޭނެ ކަމަށް ބެލެވެނީ ގާތްގަނޑަކަށް 300 މިލިއަން ރުފިޔާކަމަށް ބަޖެޓު ފޮތުގައި ފާހަގަކޮށްފައިވެއެވެ.