ބޭންކް އޮފް މޯލްޑިވްސްއިން މުޅި ރާއްޖެއަށް ބޭންކިންގ ޚިދުމަތް ފުޅާކުރުމަށް ކުރަމުންދާ މަސައްކަތްތަކުގެ ދަށުން، ރާއްޖޭގެ އެކި އަތޮޅުތަކުގައި މުޅިން އަލަށް ހަތް ބްރާންޗެއް ރަސްމީކޮށް ހުޅުވައިފިއެވެ. ގައުމީ ބޭންކުން ހުޅުވި މި އައު ބްރާންޗުތައް ރަސްމީކޮށް އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ. މިއީ ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް ފަސޭހަކަމާއެކު މާލީ ޚިދުމަތްތައް ފޯރުކޮށްދިނުމަށް ބޭންކުން ކުރަމުންދާ އިންވެސްޓްމަންޓްތަކުގެ ތެރެއިން އެޅުނު މުހިންމު ފިޔަވަޅެކެވެ.
މި ހަތް ބްރާންޗާއެކު ބޭންކް އޮފް މޯލްޑިވްސްގެ ބްރާންޗުތަކުގެ އަދަދު މިހާރު ވަނީ ރާއްޖޭގެ 20 އަތޮޅުގައި 55 އަށް އިތުރުވެފައެވެ. އަލަށް ހުޅުވުނު ބްރާންޗުތައް ގާއިމުކޮށްފައިވަނީ ހއ. ހޯރަފުށި، ށ. ކަނޑިތީމު، ރ. އަލިފުށި، ޅ. ހިންނަވަރު، އދ. މާމިގިލި، ލ. މާމަންދޫ އަދި ގއ. ގެމަނަފުށީގައެވެ. މި ސަރަހައްދުތަކަކީ އިގްތިސާދީ ގޮތުންނާއި އާބާދީގެ ގޮތުން ފާހަގަކޮށްލެވޭ މުހިންމު ރަށްތަކެކެވެ.
ބޭންކް އޮފް މޯލްޑިވްސްގެ ސީއީއޯ އަދި މެނޭޖިންގ ޑައިރެކްޓަރ މުހައްމަދު ޝަރީފް ވިދާޅުވި ގޮތުގައި، ބޭންކަށް ލިބޭ ކުރިއެރުމާއެކު ރައްޔިތުންނަށް ޚިދުމަތް ދިނުމަށް ކުރާ ހޭދަ އިތުރުކުރުމަކީ ބޭންކުގެ އެންމެ ބޮޑު އަމާޒެވެ. ބޭންކުގެ މާލީ ހާލަތު ވަރުގަދަވުމުގެ ސަބަބުން މުޅި ރާއްޖެ ހިމެނޭ ބޭންކިންގ ވިއުގަ އިތުރަށް ފުޅާކުރުމަށް މަގުފަހިވެ، އާންމު ފަރުދުންނާއި ވިޔަފާރިތަކަށް ބޭނުންވާ ޚިދުމަތްތައް ފަސޭހައިން ލިބޭނެ ގޮތް ހަމަޖެހިގެންދާނެއެވެ.
މި އައު ބްރާންޗުތަކުގެ އިތުރުން ބޭންކުން ވަނީ އޭޓީއެމްގެ ވިއުގަ ފުޅާކުރުމުގެ ބޮޑު މަޝްރޫއެއްވެސް ކުރިއަށް ގެންގޮސްފައެވެ. އެގޮތުން މުޅިން އަލަށް 90 އޭޓީއެމް ބަހައްޓާފައިވާއިރު، މީގެ ތެރޭގައި 70 ޔޫއެސް ޑޮލަރު އޭޓީއެމް ހިމެނެއެވެ. މިއީ ޚާއްސަކޮށް ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށާއި ރަށްރަށުގެ ގެސްޓްހައުސް ވިޔަފާރިތަކަށް ލިބިގެންދިޔަ ވަރަށް ބޮޑު ލުޔެކެވެ. މިހާރު ބީއެމްއެލްއިން ދަނީ 55 ބްރާންޗާއި، ރާއްޖޭގެ ހުރިހާ މީހުން ދިރިއުޅޭ ރަށެއް ހިމެނޭހެން 340 އަށްވުރެ ގިނަ ސެލްފް ސަރވިސް އޭޓީއެމް މެދުވެރިކޮށް ރައްޔިތުންނަށް ޚިދުމަތް ދެމުންނެވެ.
