ގައުމީ އެއާލައިން، މޯލްޑިވިއަންއިންގެ ފުރަތަމަ ވައިޑް-ބޮޑީ މަތިންދާބޯޓު ޗައިނާ އަށް ކުރާ ފުރަތަމަ ދަތުރުތަކަށް ޚާއްސަ ފެއަރއެއް ތަޢާރަފްކޮށްފިއެވެ.
މި ބޯޓު ރާއްޖެ ގެނެސްފައި ވަނޯ މިމަހުގެ 5 ވަނަ ދުވަހުއެވެ. މި ބޯޓުގެ ދަތުރުތައް ޗައިނާގެ ތިން ސިޓީއަށް ހަފްތާއަކު ތިން ދަތުރުކުރުމަށް ވަނީ ނިންމާފައެވެ.
ފުރަތަމަ ދަތުރު ޗެންގްޑޫއަށް މިމަހުގެ 22 އަދި 30ގައި ކުރަން ހަމަޖެހިފައިވާއިރު، މިމަހުގެ 24 އާއި ފެބުރުއަރީ މަހުގެ 1 ވަނަ ދުވަހު ބެއިޖިންގްއަށް އަދި މިމަހުގެ 27 ވަނަ ދުވަހާއި ފެބުރުއަރީ މަހުގެ 4 ވަނަ ދުވަހު ޝަންގްހާއީއަށް ދަތުރު ކުރުމަށް ވަނީ ހަމަޖެހިފައެވެ.
މި ދަތުރުތަކުގައި ކޮންމެ ސިޓީއަކަށް ފުރަތަމަ ދެ ދަތުރަށް ޚާއްސަ ފެއަރ ލިބޭއިރު، މިއިން ފެއަރގައި 40 ކިލޯގެ ލަގެޖާއި ކެއުމުގެ ޕެކޭޖެއް ހިމެނެއެވެ.
ރާއްޖޭގެ ފަތުރުވެރިކަން ކުރިއެރުވުމަށްޓަކައި، ފަތުރުވެރިން ގެނެވޭ މަންޒިލްތަކަށް ޤައުމީ އެއަރލައިނުން ސީދާ ދަތުރުތައް ފެށުމަށް ވައިޑް-ބޮޑީ އެއާކްރާފްޓް އޮޕަރޭޝަން ތަޢާރަފްކުރުމަށް ސަރުކާރުން ނިންމެވީ 2023 ވަނަ އަހަރުގެ ޑިސެންބަރު މަހުގެ 17 ވަނަ ދުވަހުއެވެ. މިއީ ރައީސް މުޢިއްޒުގެ ރިޔާސީ ވަޢުދުފުޅެކެވެ.
