ޕަބްލިކް ސެކްޓާ އިންވެސްޓްމެންޓް ޕްރޮގްރާމް (ޕީއެސްއައިޕީ)ގެ ދަށުން މި އަހަރުގެ މިހާތަނަށް 325 މިލިއަން ރުފިޔާ ހޭދަކޮށްފި އެވެ.
ޕީއެސްއައިޕީގެ މަޝްރޫއުތަކުގެ ތެރެއިން އެންމެ ބޮޑު ހޭދައެއް ކުރީ އެއާޕޯޓު މަޝްރޫއުތަކާއި ބިން ހިއްކުމާއި ބަނދަރު ހެދުމުގެ މަޝްރޫއުތަކަށެވެ. އެއާޕޯޓު މަޝްރޫއުތަކަށް 208 މިލިއަން ރުފިޔާ ހޭދަކުރި އިރު ބިން ހިއްކުމަށް 74 މިލިއަން ރުފިޔާ ހަރަދު ކުރި އެވެ. އަދި ބަނދަރު ހެދުމުގެ މަޝްރޫއުތަކަށް ވަނީ 28 މިލިއަން ރުފިޔާ ހޭދަކޮށްފަ އެވެ.
އެހެން އަހަރުތަކާ ހިލާފަށް މިއަހަރުގެ ބަޖެޓުގައި ޕީއެސްއައިޕީ ޕްރޮޖެކްޓްތަކުގެ ތަފްސީލެއް ނެތެވެ.
މިދިޔަ އަހަރުތަކުގެ ބަޖެޓުގައި ވަކިވަކި ރަށްރަށުގައި ހިންގާ ޕީއެސްއައިޕީގެ މަޝްރޫއުތަކުގެ ނަމާއި އެ މަޝްރޫއުތަކަށް ކަނޑައަޅާފައިވާ ބަޖެޓާއި އެ ޕްރޮޖެކްޓްތައް މިހާރު އޮތް ސްޓޭޖް ވެސް އެނގެ އެވެ. ނަމަވެސް އާ ސަރުކާރުގެ ފުރަތަމަ ބަޖެޓުގައި އޭގެ ތަފްސީލުތައް ހިމަނާފައެއް ނުވެ އެވެ.
ބަޖެޓު ފޮތުގައިވާ ގޮތުން ޕީއެސްއައިޕީގެ މަޝްރޫއުތަކަށް 12.4 ބިލިއަން ރުފިޔާ ހިމަނާފައިވެ އެވެ. އޭގެ ތެރެއިން ސަރުކާރުން އަލަށް ހިމެނި ޕްރޮޖެކްޓްތަކަށް ތިން ބިލިއަން ރުފިޔާ ބަޖެޓުކުރި އެވެ.
