ދުނިޔޭގެ ކެންސަރު ދުވަހާ ގުޅުވައިގެން، ފާއިތުވި ހޮނިހިރު ދުވަހު ކެންސާ ސޮސައިޓީގެ އިސްނެގުމުގައި ބޭއްވުނު “ޔުނައިޓެޑް ބައި ޔުނީކް” ހަރަކާތުގައި ޓްރީ ޓޮޕް ހޮސްޕިޓަލުން ބައިވެރިވެއްޖެއެވެ.
މުޖުތަމަޢުގެ ހޭލުންތެރިކަން އިތުރުކުރުމަށް އަމާޒުކޮށްގެން ބޭއްވުނު މި ހަރަކާތުގައި، ޓްރީ ޓޮޕް ހޮސްޕިޓަލުގެ ފަރާތުން ބައިވެރިވެވަޑައިގަތީ އެ ހޮސްޕިޓަލުގެ ސްޕެޝަލިސްޓް އޮންކޮލޮޖިސްޓް ޑރ. މުޙައްމަދު ޢަމްރު އާއި ކޮންސަލްޓަންޓް އީ.އެން.ޓީ ޑރ. ރާޖޭޝް ވާލަންދުއެވެ. މި ދެ ޑޮކްޓަރުންނަކީވެސް ކެންސަރާ ގުޅޭ ފަރުވާ އަދި ސަރޖަރީގެ ދާއިރާއިން ފާހަގަކޮށްލެވޭ ތަޖުރިބާކާރު ޑޮކްޓަރުންނެވެ.
މި ހަރަކާތުގައި ޑރ. ރާޖޭޝް އަދި ޑރ. ޢަމްރު ވަނީ ދިވެހިރާއްޖޭގައި އާންމުކޮށް ފެންނަ ކެންސަރު ބަލިތަކާއި، އެ ބަލިތައް ދެނެގަތުމުގެ ގޮތްތަކުގެ މަޢުލޫމާތު ހިއްސާކުރައްވާފައެވެ. އަދި ހަމައެހެންމެ، ކެންސަރުގެ ފަރުވާ ހޯދަމުންދާއިރު ދިރިއުޅުން ބައްޓަންކުރާނެ ގޮތްތަކާ ބެހޭ މަޢުލޫމާތުވެސް ވަނީ ފޯރުކޮށްދެއްވާފައެވެ.
ޓްރީ ޓޮޕް ހޮސްޕިޓަލުން ހާމަކުރި ގޮތުގައި، ސިއްޙީ ހޭލުންތެރިކަމުގެ ހަރަކާތްތަކަށް އެ ހޮސްޕިޓަލުން ޚާއްޞަ އަހައްމިއްޔަތުކަމެއް ދެއެވެ. އަދި މުޖުތަމަޢުގެ ސިއްޙީ ދުޅަހެޔޮކަން އިތުރުކުރުމަށް ގިނަގުނަ މަސައްކަތްތަކެއް ކުރަމުން ގެންދާ ކަމަށްވެސް އެ ފަރާތުން ފާހަގަކުރިއެވެ.
ދުނިޔޭގެ ކެންސަރު ބަލީގެ ދުވަސް ފާހަގަކުރެވެނީ ކޮންމެ އަހަރެއްގެވެސް ފެބުރުވަރީ މަހުގެ 4 ވަނަ ދުވަހުއެވެ.
